“Hej, pse bre qeveria mban 600 milionë euro në llogarinë e saj bankare?”

Ish kryeministri i Kosovës, deputeti i LDK-së, Avdullah Hoti ka reaguar ndaj veprimeve të qeverisë së Kurtit duke pyetur se, përse duhet qeveria të mbajë 600 milionë euro në llogarinë e saj bankare?!

Hoti, përmes një postimi në Facebook, ka thënë se pret që ekonomistët e qeverisë t’a shpjegojnë këtë për qytetarët.

“Kjo gjendje paraqet papërgjegjësi dhe paaftësi për të udhëhequr shtet”, ka shkruar Hoti, transmeton Telegrafi.

“Bilanci bankar i Qeverisë më 30 qershor 2022 ka arritur gati 600 milionë euro, që është afër 7% e Produktit të Brendshëm Bruto (PBB). Kjo është shumë përtej kufirit të bilancit bankar të nevojshëm që duhet të ketë Qeveria për të qenë mjaftueshëm likuide, që është rreth 4.5% e PBB-së apo rreth 390 milionë euro. Ky nivel kaq i lartë i bilancit bankar nënkupton se Qeveria po mban rreth 210 milionë euro pa asnjë nevojë, të cilat mjete po devalvohen edhe nga inflacioni i lartë. Sikur këto mjete të qarkullonin në ekonomi, ato do të multiplikoheshin dy deri në tre herë, duke rritur kështu kërkesën agregate dhe rrjedhimit të ardhurat, konsumin dhe punësimin”, ka shkruar Hoti.

Ai ka thënë po ashtu se, “në një situatë inflacioni tepër të lartë, dhe me afër 600 milionë euro para të gatshme në llogari, është e papranueshme pse Qeveria nuk i indekson pensionet, skemat sociale, pagat dhe subvencionet në bujqësi sipas normës së inflacionit. Për më tepër, nuk e heq përkohësisht as akcizën në derivate për të ulur çmimin e derivateve dhe, rrjedhimisht, të shumë produkteve të tjera, çmimi i të cilave ndikohet shumë nga kostot e transportit”.

“Përse duhet Qeveria të mbajë 600 milion euro në llogarinë e saj bankare?! Pres që ekonomistët e qeverisë t’a shpjegojnë këtë për qytetarët. Kjo gjendje paraqet papërgjegjësi dhe paaftësi për të udhëhequr shtet – e kam fjalën për shtet me ekonomi të tregut’, ka thënë ai.

Ish kryeministri Hoti ka theksuar se, ky nivel i bilancit bankar të Qeverisë përbën edhe abuzim me detyrën, pasi ligji i jep të drejtë Qeverisë të mbledh tatime, por duke ruajtur barazpeshën sociale dhe ekonomike.

(Visited 19 times, 1 visits today)